Baakkoo Tibbeetti daldalaa Oromoo qarshii saamuuf dhukaasa halkaniin banameen miidhaa guddaan irra dhaqqabuu himame.
Shaggar Lixaa aanaa Baakkoo Tibbeetti daldalaa Oromoo tokkotti dhukaasa dhukaafameen miidhaa guddaan dhaqqabuu himame.
Gochaan kun tibbana jechuun akka lakkoofsa Itoophiyaatti Eebla 16,2016 Baakkoo Tibbee magaalaa Baakkootti uumamuusaa barameera. Namni miidhaan irra gahe kun Dinqaa Olaanaa kan jedhamu yoo ta’u, daldalaa midhaanii waan ta’eef guyyaa qarshii baafatee waan midhaan ittiin bitu qopheeffatee bakkanni rafutti halkan itti seenamuu himame.
Kanaanis waraanni mootummaa maallaqa harka jiru akka itti kennu gaafannaan waan dideef qofa rasaasaan rukutuu isaanii barameera. Namni rasaasaan rukutame kunis yeroo ammaa hospitaala Aabet Finfinneetti yaalamaa jiraachuu barameera. Daldalaan kun rasaasaan bakka sadii rukutamuu isaas gabaasichi caqasee jira.